ಬೆಂಗಳೂರು: ಭಾರತದ ಐಟಿ ದಿಗ್ಗಜ ಇನ್ಫೋಸಿಸ್‌ 600 ಹೊಸ ಉದ್ಯೋಗಿಗಳನ್ನು ವಜಾಗೊಳಿಸಿದೆ ಎಂದು ವರದಿಯಾಗಿದೆ.ಆಂತರಿಕ ಪರೀಕ್ಷೆಯಲ್ಲಿ ಅನುತ್ತೀರ್ಣರಾದ ಕಾರಣಕ್ಕಾಗಿ ಫ್ರೆಶರ್‌ಗಳನ್ನು ವಜಾ ಮಾಡಲಾಗಿದೆ.
ಇನ್ಫೋಸಿಸ್‌ಗೂ ಮೊದಲು ಮತ್ತೊಂದು ಸಾಫ್ಟ್‌ವೇರ್‌ ಕಂಪನಿ ವಿಪ್ರೋ ಕೂಡ ಇದೇ ಕಾರಣಕ್ಕಾಗಿ ಕೆಲವು ಫ್ರೆಶರ್‌ಗಳನ್ನು ಕೆಲಸದಿಂದ ತೆಗೆದುಹಾಕಿತ್ತು.ಜಾಗತಿಕ ಮಟ್ಟದಲ್ಲಿ ಆರ್ಥಿಕ ಹಿಂಜರಿತ ಮತ್ತು ಕೋವಿಡ್‌ ಸಾಂಕ್ರಾಮಿಕದ ಭೀತಿಯಿಂದಾಗಿ ಐಟಿ ವಲಯದಲ್ಲಿ ಹೆಚ್ಚಿನ ಸಂಖ್ಯೆಯ ವಜಾಗಳು ನಡೆಯುತ್ತಿವೆ. ಗೂಗಲ್‌, ಮೈಕ್ರೋಸಾಫ್ಟ್‌, ಮೆಟಾ, ಅಮೆಜಾನ್‌ ಮತ್ತು ವಿಪ್ರೋ, ಇನ್ಫೋಸಿಸ್‌ ಹಾಗೂ ಭಾರತದಲ್ಲಿನ ಇತರ ಐಟಿ ವಲಯದ ದಿಗ್ಗಜ ಕಂಪನಿಗಳು ಉದ್ಯೋಗಿಗಳನ್ನು ವಜಾಗೊಳಿಸುವುದಾಗಿ ಘೋಷಿಸಿವೆ. ವರದಿಯೊಂದರ ಪ್ರಕಾರ, ಭಾರತದಲ್ಲಿ 14 ಸ್ಟಾರ್ಟಪ್‌ಗಳು ಜನವರಿಯಲ್ಲಿ 2,100ಕ್ಕೂ ಹೆಚ್ಚು ಜನರನ್ನು ವಜಾಗೊಳಿಸಿವೆ.”ನಾನು ಆಗಸ್ವ್‌ 2022ರಲ್ಲಿ ಇನ್ಫೋಸಿಸ್‌ಗೆ ಸೇರಿಕೊಂಡೆ ಮತ್ತು ತರಬೇತಿ ಪಡೆದಿದ್ದೇನೆ. ನನ್ನ ತಂಡದಲ್ಲಿ 150ರಲ್ಲಿ 60 ಮಂದಿ ಮಾತ್ರ ಪರೀಕ್ಷೆಯಲ್ಲಿ ತೇರ್ಗಡೆಯಾಗಿದ್ದಾರೆ. ಉಳಿದ 85 ಮಂದಿಯನ್ನು ವಜಾಗೊಳಿಸಲಾಗಿದೆ,” ಎಂದು ಕಂಪನಿಯಲ್ಲಿ ಫ್ರೆಶರ್‌ ಆಗಿ ಸೇರಿಕೊಂಡಿದ್ದ ಉದ್ಯೋಗಿಯೊಬ್ಬರು ಹೇಳಿದ್ದಾರೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.
ಕಂಪನಿ ಏನು ಹೇಳಿದೆ?
ಆಂತರಿಕ ತರಬೇತಿಯ ಸಮಯದಲ್ಲಿ ಉದ್ಯೋಗಗಳನ್ನು ಕಡಿತಗೊಳಿಸಲಾಗುತ್ತದೆ ಎಂದು ಕಂಪನಿಯ ಪ್ರತಿನಿಧಿ ಹೇಳಿದ್ದಾರೆ. ಐಟಿ ವಲಯದಲ್ಲಿ ಭಾರತದ ಎರಡನೇ ಅತಿದೊಡ್ಡ ಕಂಪನಿಯಾದ ಇನ್ಫೋಸಿಸ್‌ 2023ರ ಮೂರನೇ ತ್ರೈಮಾಸಿಕದಲ್ಲಿ ನಿವ್ವಳ ಲಾಭದಲ್ಲಿ ವಾರ್ಷಿಕ ಶೇ. 13.4 ಹೆಚ್ಚಳವನ್ನು ದಾಖಲಿಸಿದೆ. ಈ ಹೆಚ್ಚಳವು 5,809 ಕೋಟಿ ರೂ.ಗಳಿಂದ 6,586 ಕೋಟಿ ರೂ.ಗೆ ಏರಿಕೆಯಾಗಿದೆ.
ಕಂಪನಿಗಳಲ್ಲಿ ಮುಂದುವರಿದ ಉದ್ಯೋಗ ಕಡಿತ*
ಇತ್ತೀಚೆಗಷ್ಟೇ ಅಮೆರಿಕ ಮೂಲದ ಪರ್ಸನಲ್‌ ಕಂಪ್ಯೂಟರ್‌ ತಯಾರಕ ಸಂಸ್ಥೆ ಡೆಲ್‌ 6,650 ಉದ್ಯೋಗಿಗಳನ್ನು ವಜಾ ಮಾಡಿರುವ ವಿಷಯ ಬಹಿರಂಗವಾಗಿದೆ.
* ಅಮೆಜಾನ್‌ 18,000 ಉದ್ಯೋಗಿಗಳನ್ನು ತೆಗೆದುಹಾಕುವುದಾಗಿ ಘೋಷಿಸಿದ್ದರೆ, ಗೂಗಲ್‌ನ ಮಾತೃ ಸಂಸ್ಥೆ ಆಲ್ಫಾಬೆಟ್‌ 12,000 ಉದ್ಯೋಗಿಗಳನ್ನು ತೆಗೆದುಹಾಕುವುದಾಗಿ ಘೋಷಿಸಿದೆ.
* ಉನ್ನತ ಐಟಿ ವಲಯದ ಕಂಪನಿಗಳಲ್ಲಿ ಒಂದಾದ ವಿಪ್ರೋ ಇದೇ ರೀತಿ 452 ಹೊಸಬರನ್ನು ವಜಾಗೊಳಿಸಿತ್ತು. ಜನವರಿ 20ರಂದು ಮಾಹಿತಿ ನೀಡಿದ್ದ ಕಂಪನಿ, ನೌಕರರ ಕಳಪೆ ಕಾರ್ಯಕ್ಷಮತೆಯಿಂದಾಗಿ ಅವರನ್ನು ವಜಾ ಮಾಡಲಾಗಿದೆ ಎಂದು ಹೇಳಿತ್ತು. ಈ ಉದ್ಯೋಗಿಗಳು ತರಬೇತಿಯ ಸಮಯದಲ್ಲಿ ಪದೇ ಪದೆ ಪರೀಕ್ಷೆಯಲ್ಲಿ ಅನುತ್ತೀರ್ಣರಾಗುತ್ತಿದ್ದರು ಎಂದು ಕಂಪನಿ ಹೇಳಿತ್ತು.
* ದೈತ್ಯ ವಿಮಾನ ತಯಾರಕ ಕಂಪನಿ ಬೋಯಿಂಗ್‌ ಪ್ರಸಕ್ತ ವರ್ಷ ಎಚ್‌ಆರ್‌ ಮತ್ತು ಫೈನಾನ್ಸ್‌ ವಿಭಾಗದಲ್ಲಿ 2,000 ಹುದ್ದೆಗಳನ್ನು ಕಡಿತ ಮಾಡುವುದಾಗಿ ಹೇಳಿದೆ.
* ಎಡ್‌ಟೆಕ್‌ ಸ್ಟಾರ್ಟಪ್‌ ಬೈಜೂಸ್ ಕಳೆದ ವಾರ ಮತ್ತೆ 1,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ವಜಾಗೊಳಿಸುವುದಾಗಿ ತಿಳಿಸಿದೆ. ಈ ಮೂಲಕ ದೈತ್ಯ ಎಡ್‌ಟೆಕ್‌ ಸಂಸ್ಥೆಯು ಕಳೆದ 6 ತಿಂಗಳಲ್ಲಿ 2ನೇ ಬಾರಿಗೆ ಉದ್ಯೋಗಿಗಳನ್ನು ವಜಾಗೊಳಿಸಿದಂತಾಗಿದೆ.
